Dina ping 25 Januari 2022, diberitakeun mun pamarentah ngagunakeun Pertamina jeung Bukit Asam ngadirikeun pabrik Dimethyl Ether (DME) kerjasama jeung Air Products and Chemical. Lumayan gede oge ieu proyek teh. Tapi ai Dimethyl Ether (DME) teh naon sih sabenerna?

Jadi kieu, barudak.. DME teh sarupaning gas nu bisa dijieun jadi bahan bakar, jiga elpiji kitu. Ai elpiji mah tinu gas alam, ai DME mah tinu batubara atawa areng biomassa anu dipanaskeun sampe ka ngaluarkeun gas. Si gas eta nu tuluy direaksikeun deui jeung metanol ameh jadi DME.

Ningali struktur kimiana mah DME teh isomerna etanol, alkohol tea: C2H6O. Isomer tea geuning, nu rumus kimana sarua ngan strukturna beda. Jeung deui bedana, DME mah kaasupna ether (R-O-R'), ai nu jadi R jeung R'-na nyaeta methyl. 

Dibandingkeun jeung elpiji (propane-butane) mah panas nu dihasilkeun si DME ieu mun dihurungkeun teh emang rada kurang. Kira-kira ngan saparona. Ngan angger we, ngaheab ari keur kompor mah. Keur ninyuh indomih mah aman keneh. Moal atah.

"Tapipa, ai angger keneh tinu batubara mah lain sarua keneh epekna kana lingkungan?"

Geus loba nu nalungtik, ngabandingkeun DME jeung bahan bakar sejen. Umumna nu arahli sepakat ai DME teh pembakaranana leuwih episien. Jadi leuwih beresih. Teu ngahasilkeun NOx utamana mah. Si NOx ieu teh nu bahaya keur lingkungan. 

Aya oge nu nyieun bahan bakar disel tinu DME ieu. Keur mobil solar atawa keur ngahurungkeun jenset. Keur ngahasilkeun setrum tea. Dibandingkeun jeung solar mah, DME leuwih beresih. Teu ngebul hideung tinu kenalpotna, bari tanaga leuwih tarik deui. 

Jadi nya ieu teh saukur ihtiar urang ameh energi kacumponan bari epek kana lingkungan ngurangan saeutik wae mah. Kitu..